Mapisarema 124 (BDSC)

1Israeri ngaati

dai Jehovha akanga asiri kurutivi kwedu,

2dai Jehovha akanga asiri kurutivi kwedu

patakarwiswa navanhu,

3apo kutsamwa kwavo kwakatimukira,

vangadai vakatimedza tiri vapenyu;

4mafashamu angadai akatifukidza,

mvura zhinji ingadai yakatikukura,

5mvura zhinji ine hasha

ingadai yakatirasira kure.

6Jehovha ngaarumbidzwe,

asina kutendera kuti tibvamburwe nameno avo.

7Tapunyuka seshiri yabva parugombe rwomuteyi;

rugombe rwadamburwa uye tapunyuka.

8Kubatsirwa kwedu kuri muzita raJehovha,

Muiti wedenga nenyika.